സി എന്‍ എ-
കൊച്ചി:
മോഹന്‍ലാല്‍ നായകനായ 'ദൃശ്യം' സിനിമയുടെ രണ്ടാം ഭാഗം ഒ ടി ടി പ്ലാറ്റ്‌ഫോമില്‍ റിലീസ് ചെയ്ത ശേഷം തിയേറ്ററില്‍ പ്രദര്‍ശിപ്പിക്കാന്‍ അനുവദിക്കില്ലെന്ന് കേരള ഫിലിം ചേംബര്‍ വ്യക്തമാക്കി.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിച്ചു ജീത്തു ജോസഫ് സംവിധാനം ചെയ്ത 'ദൃശ്യം 2' ഒ ടി ടി റിലീസ് ചെയ്യാനിരിക്കെയാണ് ഫിലിം ചേമ്പറിന്റെ പ്രഖ്യാപനം.
ഒടിടിയ്ക്ക് ശേഷം സിനിമ തിയറ്റര്‍ റിലീസ് ചെയ്യാമെന്ന് ആരും പ്രതീക്ഷിക്കണ്ടെന്നും മോഹന്‍ലാലിനു മാത്രമായി പ്രത്യേക പരിഗണന നല്‍കാനാവില്ലെന്നും ഫിലിം ചേംബര്‍ പ്രസിഡന്റ് വിജയകുമാര്‍ പറഞ്ഞു. സൂപ്പര്‍ താരത്തിനോ സൂപ്പര്‍ നിര്‍മാതാവിനോ പ്രത്യേക പരിഗണന നല്‍കാനാവില്ലെന്നും അദ്ദേഹം വ്യക്തമാക്കി.
'സൂഫിയും സുജാതയും' എന്ന സിനിമ ഒടിടിയില്‍ റിലീസ് ചെയ്യുന്നതിനെ എതിര്‍ത്ത മോഹന്‍ലാല്‍ സ്വന്തം കാര്യം വന്നപ്പോള്‍ വാക്ക് മാറ്റരുതെന്നും പലര്‍ക്കും പല നീതി ശരിയല്ലെന്നും ഫിലിംചേംബര്‍ പ്രതികരിച്ചു.
പുതുവര്‍ഷ ദിനത്തിലാണ് ദൃശ്യത്തിന്റെ രണ്ടാം ഭാഗം ഒടിടി റിലീസായിരിക്കുമെന്ന് സംവിധായകന്‍ പ്രഖ്യാപിച്ചത്. ഇതിനെതിരെ തിയറ്റര്‍ ഉടമകള്‍ രംഗത്ത് വന്നെങ്കിലും നിര്‍മാതാവും അണിയറ പ്രവത്തകരും തീരുമാനത്തില്‍ നിന്നും പിന്നോട്ട് പോയിരുന്നില്ല.
'മരക്കാര്‍ അറബിക്കടലിന്റെ സിംഹം' സിനിമയുമായി ബന്ധപ്പെട്ട സാമ്പത്തിക പ്രതിസന്ധിയെ തുടര്‍ന്നാണ് 'ദൃശ്യം 2' ഒടിടിയില്‍ റിലീസ് ചെയ്യാന്‍ തീരുമാനിച്ചത്. ഈ പശ്ചാത്തലത്തിലാണ് ഫിലിം ചേംബറിന്റെ പുതിയ പ്രഖ്യാപനം.
